اس وقت بھی بہت سے صارفین مائیکروسافٹ ونڈوز کے پرانے ورژنز کو بڑے شوق سے استعمال کر رہے ہیں۔ ونڈوز کے پرانے ورژنز میں سب سے کامیاب ورژن ونڈوز 7 ہیں، جو اب بھی  صارفین کی ایک بہت بڑی تعداد کے زیر استعمال ہے۔
اگر آپ بھی ونڈوز 7 استعمال کرتے ہیں تو وقت آ گیا ہے کہ آپ نئے ورژن پر منتقل ہو جائیں۔ کیونکہ مائیکروسافٹ اب ایک سال میں ہی ونڈوز 7 کی سپورٹ ختم کر رہا ہے۔
ونڈوز وسٹا کی ناکامی کے بعد ونڈوز7 ایک کامیاب آپریٹنگ سسٹم کے طور پر سامنے آیا۔ اس کے بعد ونڈوز 8 آیا لیکن صارفین نے اس پر زیادہ توجہ نہیں دی۔ ونڈوز 7 کی مقبولیت کا اندازہ یہاں سے لگا لیں کہ کچھ دن پہلے ہی ونڈوز 10 کے صارفین کی تعداد ونڈوز7 کے صارفین سے بڑھ گئی ہے۔ پھر بھی اس وقت ونڈوز 7 تقریباً 42.8 فیصد ونڈوز کمپیوٹروں میں انسٹال ہے۔ توقع ہے کہ 14 جنوری 2020 کو بھی، جب ونڈوز 7 کی سپورٹ ختم کی جائے گی، یہ بہت سے کمپیوٹروں پر انسٹال ہوگی۔ اس تاریخ کے بعد مائیکرو سافٹ ونڈوز 7 کی مفت سپورٹ تو ختم کر دی جائے گی لیکن ہو سکتا ہے بھاری قیمت کے عوض کاروباری صارفین کو اس کی سپورٹ فراہم کی جائے۔

تاریخ اشاعت : منگل 15 جنوری 2019