آسٹریلیا نے ہواوے اور زیڈ ٹی ای پر فائیوجی پراجیکٹس کے لیے آلات فراہم کرنے پر پابندی لگا دی
آسٹریلیوی حکومت نے ہواوے اور زیڈ ٹی ای پر اپنے فائیوجی موبائل نیٹ ورک کی تیاری کے لیے آلات کی فراہمی پر پابندی لگا دی۔ اس اقدام کے بارے میں آسٹریلیوی حکومت نے بھی وہی وجہ بیان کی ہے جو امریکا نے چینی کمپنیوں پر پابندی لگاتے ہوئے کی تھی۔ آسٹریلیا نے اس اقدام کی وجہ بیرونی مداخلت اور ہیکنگ کے خطرات بتائی ہے۔ امریکا نے تو سرکاری اہلکاروں پر چینی کمپنیوں کی بنائی ڈیوائسز استعمال کرنے پر بھی پابندی لگا دی ہے۔
ہواوے کے آسٹریلیوی آفس نے ایک ٹوئٹ میں حکومت کے اس فیصلے کو برا فیصلہ قرار دیا، جس کا آسٹریلیوی صآرفین پر منفی اثر پڑے گا۔ ہواوے آسٹریلیا میں 15 سالوں سے وائرلیس ٹیکنالوجی فراہم کر رہا ہے۔
اس صورتحال پر بیجنگ بھی خوش نہیں ہے۔ چینی حکومت کا کہنا ہے کہ آسٹریلیوی حکومت چینی کمپنیوں پر پابندی کے لیے مصنوعی عذر پیش کر رہی ہے۔ اس سے چینی کمپنیاں آسٹریلیوی مارکیٹ میں آزادانہ مقابلہ نہیں کر سکیں گے۔
چینی قانون کے مطابق کوئی بھی کمپنی یا شخص ضرورت پڑنے پر جاسوی کے لیے حکومت سے تعاون کرنے کا پابند ہے۔ اسی وجہ سے ہواوے کے آلات شکوک و شبہات کی زد میں رہتے ہیں۔
تاریخ اشاعت : ہفتہ 25 اگست 2018