مہوش حیات لڑکیوں کے حقوق کیلئے خیر سگالی سفیر مقرر

ایسا پاکستان دیکھنا چاہتی ہوں جہاں لڑکیوں کو تعلیم حاصل کرنے کے مواقع دیئے جائیں، مہوش حیات

لاہور : نامور اداکارہ مہوش حیات تمغہ امتیاز کے بعد ایک اور اعزاز اپنے نام کرنے میں کامیاب ہوگئیں۔اداکارہ کو وفاقی وزارت انسانی حقوق کی جانب سے لڑکیوں کے حقوق کی خیر سگالی سفیر منتخب کیا گیا ہے ۔مہوش حیات نے اس خبر کا اعلان ٹوئٹر پر ایک ویڈیو کے ذریعے کیا۔ویڈیو میں اداکارہ نے کہا کہ مجھے یہ بتاتے ہوئے بہت خوشی محسوس ہورہی ہے کہ وفاقی وزارت انسانی حقوق حکومت پاکستان نے مجھے پاکستان میں لڑکیوں کے حقوق کیلئے خیر سگالی سفیر بنادیا ہے، یہ میرے لیے بہت فخر کی بات ہے کہ میں لڑکیوں کو ان کے حقوق دلانے میں اہم کردار ادا کرسکتی ہوں۔
انہوں نے کہا کہ میں ایک ایسا پاکستان دیکھنا چاہتی ہوں جہاں لڑکیوں کو تعلیم حاصل کرنے کے مواقع دیئے جائیں، آپ بھی اس مشن میں میرا ساتھ دیں کیوں کہ میرا ایسا ماننا ہے کہ اگر لڑکیوں کو ان کا حق دیا جائے تو وہ دنیا بدل سکتی ہیں۔وفاقی وزارت انسانی حقوق حکومت پاکستان نے بھی اپنے ٹوئٹر اکاؤنٹ پر ایک ویڈیو شیئر کی جس میں مہوش حیات لڑکیوں کے حقوق پر بات کرتی نظر آئیں۔واضح رہے کہ ماضی میں اداکارہ ہمیشہ ہی سیاسی امور، حقوق نسواں اور مسئلہ کشمیر پر کھل کر بات کرتی آئی ہیں۔

تاریخ اشاعت : ہفتہ 12 اکتوبر 2019

Share On Whatsapp