وزیر اعظم نے اسلام آباد کے زون 4میں نیا پاکستان ہائوسنگ منصوبے کے تحت 18500مکانات کی تعمیر کا سنگ بنیاد رکھ دیا

ڈیڑھ سال میں دس ہزار گھر بذریعہ قرعہ اندازی غریبوں کو دئیے جائیں گے ،عمران خان , سکیم کاآغاز اسلام آباد کی دو کچی آبادیوں سے ہوگا ، دائرہ کار پورے ملک تک بڑھایا جائے گاخطاب

اسلام آباد : وزیر اعظم عمران خان نے اسلام آباد کے زون 4میں نیا پاکستان ہائوسنگ منصوبے کے تحت 18500مکانات کی تعمیر کا سنگ بنیاد رکھ دیا ۔ ڈیڑھ سال میں دس ہزار گھر بذریعہ قرعہ اندازی غریبوں کو دئیے جائیں گے ۔ سکیم کاآغاز اسلام آباد کی دو کچی آبادیوں سے ہوگا جبکہ دائرہ کار پورے ملک تک بڑھایا جائے گا۔ جمعرات کے روز نیا پاکستان ہائوسنگ منصوبے کا سنگ بنیاد رکھتے ہوئے وزیر اعظم عمران خان نے کہا ہے کہ منصوبے کے آغاز پر خوش ہوں حکومت کے پاس اتنا سرمایہ نہیں کہ اکیلے 50لاکھ گھربنا سکے اس لئے پرائیویٹ سیکٹر کے ساتھ ملکر گھروں کی تعمیر کی جائیگی ۔
اسلام آباد کے زون فور میں ساڑھے اٹھارہ ہزار مکانات کی تعمیر کا سنگ بنیاد رکھ دیا گیا ہے جس میں ڈیڑھ سال کے عرصے میں دس ہزارگھر بذریعہ قرعہ اندازی غریبوں کو دئیے جائیں گے ۔ حکومت زمین فراہم کرے گی جبکہ نجی شعبہ مکانات کی تعمیر کیلئے سرمایہ کاری کرے گا۔ وزیر اعظم نے کہا کہ دنیا کے دیگر ممالک میں بینک گھر بنانے کیلئے قرض دیتے ہیں ۔ بھارت، ترکی ، ملائشیا سمیت دیگر ممالک میں بھی اس طرح کی سکیمیں کامیاب رہی ہیں جبکہ پاکستان میں گھروں کی تعمیر کیلئے بینکوں کے قرض دینے کی شرح انتہائی کم ہے ۔ انہوںنے کہا کہ منصوبے کا آغاز اسلام آباد کی دو کچی آبادیوں سے کیا جارہا ہے جبکہ اسکا دائرہ کار پورے ملک تک بڑھایا جائیگا۔

تاریخ اشاعت : جمعرات 11 جولائی 2019

Share On Whatsapp